“Onun yarısı” adlı gənc rəssamların qrup sərgisi keçirilib

4-5 iyul tarixlərində “ArtCoLab” Yaradıcı Gənclər Platformasının təşkilatçılığı, Azərbaycan Respublikası Mədəniyyət Nazirliyi və Muzey Mərkəzinin tərəfdaşlığı ilə “Onun yarısı” adlı gənc rəssamların qrup sərgisi keçirilib.

Platformanın 5 illik yubileyinə həsr olunmuş sərgi 4 iyul tarixində Muzey Mərkəzində yerləşən Sərgi Qalereyasında açılıb və platformada təmsil olunan 26 gənc rəssam tərəfindən ərsəyə gələn 45 əsər ictimaiyyətə təqdim olunub.

Sərgilənən əsərlərin əksəriyyəti kətan üzərində yağlı boya ilə, yalnız bir əsər isə kağız üzərində sulu boya ilə işlənmiş müxtəlif mövzulu əsərlər olub.

Açılış mərasimində Azərbaycan Respublikası Mədəniyyət Nazirliyinin Aparat rəhbəri Mustafa Abbasbəyli, “Heydər Əliyev” ordenli heykəltəraş Ömər Eldarov, millət vəkilləri Sabir Rüstəmxanlı, Cavanşir Feyziyev, Arzu Nağıyev, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva, Muzey Mərkəzinin direktoru Liana Vəzirova, Azərbaycan Rəssamlar İttifaqının katibi, xalq rəssamı Ağaəli İbrahimov, “ArtColab” Yaradıcı Gənclər Platformasının rəhbəri Çinarə Quliyeva, “ArtColab” Yaradıcılıq Mərkəzinin baş müəllimi Casiyət Abdullayeva, ictimai xadimlər, gənc rəssamlar və kreativ sənayedə çalışan menecerlər iştirak ediblər.

İlk olaraq aparıcı Nigar Yusifova qonaqları salamlayaraq tədbiri açıq elan edib. Sonra isə “ArtCoLab” Yaradıcı Gənclər Platformasının rəhbəri Çinarə Quliyeva açılış nitqi ilə çıxış edib və sərgi ilə bağlı ətraflı məlumat verib. Daha sonra Ömər Eldarov, Sabir Rüstəmxanlı, Cavanşir Feyziyev, Arzu Nağıyev, Ağaəli İbrahimov çıxış edərək sərgi haqqında fikirlərini bölüşüblər.

Çıxışların ardından gənc rəssamların təltifolunma mərasimi baş tutub. Sonda sərginin rəmzi açılışı olan qırmızı lent kəsilib və qonaqlar sərgi ilə tanış olublar.

Qeyd edək ki, “ArtCoLab” Yaradıcı Gənclər Platforması tərəfindən 2022-ci ildə “Başla!” və 2023-cü ildə isə Ümummilli Lider Heydər Əliyevin 100 illik yubileyinə həsr olunan “100 il” adlı gənc rəssamların qrup sərgilərinin ardından bu il keçirilən “Onun Yarısı” adlı qrup sərgisi sayca üçüncüdür.