Hökumət avtomobilin parklanmasına görə qiymətlər müəyyən etdi

Nazirlər Kabineti (hökumət) “Nəqliyyat vasitələrinin parklanmasına görə ödənişin məbləği”nin təsdiq edilməsi haqqında” Qərar qəbul edib.

Aztime.az Marja.az-a istinadən xəbər verir ki, qərarı Baş nazir Əli Əsədov imzalayıb.

Qərar ilə nəqliyyat vasitələrinin parklanmasına görə ödənişin məbləğləri təsdiq edilib.

Qərar dərc edildiyi tarixdən 30 gün sonra qüvvəyə minir.

Qərara görə, Bakı şəhərinin mərkəzində (“İçərişəhər” Dövlət TarixMemarlıq və “Qala” Dövlət Tarix-Etnoqrafiya qoruqlarının əraziləri istisna olmaqla) 1 saat üçün ödənişin məbləği 1 manat, 1-ci zona üçün 70 qəpik, 2-ci zona üçün 40 qəpik,  3-cü zona üçün 30 qəpik təsdiq edilib, 4-cü zonada isə parklanma ödənişsizdir.

Gəncə və Sumqayıt şəhərlərinin mərkəzində avtomobilin 1 saat parklanmasına görə qiymət 40 qəpik, 1-ci zonada 20 qəpik, 2-ci zonada isə ödənişsiz müəyyən olunub.

Digər şəhərlərdə parklanma ödənişsizdir.

Qərara görə, “Yol hərəkəti haqqında” Azərbaycan Respublikası Qanununun 53-cü maddəsinin XV hissəsinə əsasən, ödənişli parklanma yerlərində nəqliyyat vasitələrinin 15 dəqiqəyədək parklanması üçün ödəniş tələb olunmur. Nəqliyyat vasitəsi 15 dəqiqədən artıq parklandıqda ödəniş tam məbləğdə hesablanır.

Nəqliyyat vasitələrinin parklanması üçün saat 22:00-dan saat 07:00-dək, eləcə də həftənin bazar günləri ödəniş tələb olunmur.

Azərbaycan Respublikası Nazirlər Kabinetinin 2019-cu il 22 aprel tarixli 187 nömrəli Qərarı ilə təsdiq edilmiş “Fərdi parklanma talonlarının forması, habelə onların verilməsi Qaydası”na uyğun olaraq fərdi parklanma talonu verilmiş şəxslər nəqliyyat vasitələrini yalnız talonda göstərilən parklanma ərazisində müəyyən olunmuş yerlərdə ödənişsiz əsaslarla saxlayırlar.