“Beşiktaş”ın idman direktoru Juninyo üçün Bakıya gəlir

“Beşiktaş”ın idman direktoru Samet Aybaba “Qarabağ”ın hücumçusu Olavio Juninyonun transferi üçün mövsüm bitmədən Bakıya gələcək.

Bu barədə Türkiyənin “Fotomaç” nəşri məlumat yayıb.

Bildirilir ki, “sambaçı”nı çox bəyənən Aybaba “qara-qartallar”ın rəhbərliyindən razılıq aldıqdan sonra “Qarabağ”la əlaqəyə keçib. Azərbaycan çempionu transfer üçün 8 milyon avro istəsə də, məbləğin endiriləcəyi də vurğulanır. Bu səbəbdən də istanbullular mövsüm bitməmiş braziliyalının keçidini həll etməyi planlaşdırırlar.

Qeyd edək ki, Samet Aybaba Avropa Liqasının 1/8 final mərhələsində “Qarabağ”ın “Bayer”lə (2:3) səfər oyununu “BayArena”da izləyib və Juninyo ilə bağlı müsbət rəy verib.