Sumqayıtda cərəyan vuran yeniyetmə növbəti dəfə əməliyyat olunacaq – Ailəsindən AÇIQLAMA

Sumqayıtda elektrik cərəyanı vuran 13 yaşlı Aslan Əliyev sabah müalicə aldığı xəstəxanadan müvəqqəti olaraq evə buraxılacaq.

Bu barədə Bizim.media-ya yeniyetmənin bibisi Qərənfil Əliyeva məlumat verib. Onun sözlərinə görə, Aslan Əliyev evə 10 günlük buraxılır, daha sonra yenə əməliyyata alınacaq:

“İki aydır Aslan xəstəxanadadır. Artıq səkkiz dəfə əməliyyat olunub. Hələ tam bərpa olunmayıb. Yanıq aldığı yerlər o qədər dərindir ki, bədəninin digər nahiyələrindən kəsib, yaralarını sağaltmağa çalışırlar. Uşaq çox əziyyət çəkir. Boynundan aldığı yanıq xəsarətləri sümüyünə qədər işləyib. Ağrılardan və əməliyyatlardan təngə gəlib. Yaddaş pozğunluğundan əziyyət çəkir”.

Qərənfil Əliyeva baş verən dəhşətli hadisədən sonra heç bir dövlət qurumunun, xüsusilə “Azərişıq” əməkdaşlarının uşağa baş çəkməməsindən, səhhəti ilə maraqlanmamasından da gileylənib:

“Bu iki ayda uşağın səhhəti ilə maraqlanan olmadı. Üstəlik “Azərişıq” günahı uşağın üstünə yıxdı. Halbuki, özlərinin səhlənkarlığı və səhvi ucbatından balam şikəst qaldı. Guya iki aydır araşdırma gedir. Bildiyim qədər işi də bağlayıblar”.

Qeyd edək ki, hadisə oktyabrın 22-də baş verib. Yeniyetməyə başın, qulaq seyvanının, sağ yuxarı ətrafın, gövdənin arxa səthinin, sol dabanın 3-cü və 4-cü dərəcəli elektrotexniki yanığı, yanıq şoku diaqnozu qoyulub.

Onu da bildirək ki, məsələ ilə bağlı Sumqayıt prokurorluğunda araşdırma aparılır. Araşdırmanın nəticəsi ilə bağlı ictimaiyyətə hələlik açıqlama verilməyib.